തെലുങ്ക് സിനിമയുടെ പുതിയ തലമുറയിലെ ശ്രദ്ധേയ താരങ്ങളിൽ ഒരാളാണ് വിജയ് ദേവരക്കൊണ്ട. അർജുൻ റെഡ്ഢി എന്ന ഒറ്റ ചിത്രത്തിലൂടെ ഇന്ത്യ മുഴുവൻ പ്രശസ്തനായ ഈ താരം പിന്നീട് ഗീതാ ഗോവിന്ദം, ഡിയർ കോമ്രേഡ് എന്നീ ചിത്രങ്ങളിലൂടെയും കയ്യടി നേടി. ഇപ്പോഴിതാ തന്റെ കരിയറിലെ ഏറ്റവും വലിയ ചിത്രവുമായി എത്തുകയാണ് ഈ യുവ താരം. വിജയ് ദേവരക്കൊണ്ടയുടെ കരിയറിലെ ആദ്യ പാൻ ഇന്ത്യൻ ചിത്രമായി ഒരുങ്ങുന്ന ലിഗർ ആണ് ആ പ്രോജക്ട്. പുരി ജഗനാഥ്‌ സംവിധാനം ചെയ്യുന്ന ഈ ചിത്രത്തിന്റെ ആദ്യ ടീസർ റിലീസ് ഈ മാസം ഉണ്ടാവുമെന്നാണ് അറിയിച്ചിരുന്നത്. എന്നാൽ കോവിഡ് പ്രതിസന്ധി വീണ്ടും രാജ്യം മുഴുവൻ അലയടിക്കുമ്പോൾ ടീസർ റിലീസ് മാറ്റി വെക്കാനുള്ള തീരുമാനമാണ് അണിയറ പ്രവർത്തകർ എടുത്തിരിക്കുന്നത്. ഈ ചിത്രത്തിന്റെ ഫസ്റ്റ് ലുക്ക് പോസ്റ്റർ വമ്പൻ പ്രേക്ഷക ശ്രദ്ധയാണ് നേടിയെടുത്തത്.ലിഗർ: സാലാ ക്രോസ്ബ്രീഡ് എന്നാണ് ചിത്രത്തിന് നൽകിയിരിക്കുന്ന ടാഗ് ലൈൻ. ഈ വർഷം സെപ്റ്റംബർ 9 നു ആണ് ലിഗർ റിലീസ് ചെയ്യാൻ തീരുമാനിച്ചിരുന്നത്. ഈ പുതിയ സാഹചര്യത്തിൽ അതിനും മാറ്റം വരുമോ എന്നത് കാത്തിരുന്നു കാണേണ്ട വസ്തുത തന്നെയാണ്. ബോളിവുഡ് താരം അനന്യ പാണ്ഡെ നായികാ വേഷം ചെയ്യുന്ന ഈ ബിഗ് ബഡ്ജറ്റ് ചിത്രം, ഹിന്ദി, കന്നഡ, തെലുങ്ക്, മലയാളം, തമിഴ് എന്നീ ഭാഷകളിൽ ആണ് റിലീസ് ചെയ്യുക. ബോളിവുഡ് സംവിധായകൻ കരൺ ജോഹർ, ചാർമി കൗർ, അപൂർവ മെഹ്ത, പുരി ജഗനാഥ്‌ എന്നിവർ ചേർന്ന് നിർമ്മിക്കുന്ന ഈ ചിത്രത്തിന് കാമറ ചലിപ്പിക്കുന്നത് വിഷ്ണു ശർമയാണ്. ഈ ചിത്രത്തിന് വേണ്ടി മിക്സഡ് മാർഷ്യൽ ആർട്‌സ് പരിശീലിച്ച വിജയ് ദേവരക്കൊണ്ട പറയുന്നത് ഇന്ത്യൻ സിനിമയിൽ ഇതുവരെ വരാത്ത തരത്തിലുള്ള ഒരു ചിത്രമായിരിക്കും ലിഗർ എന്നാണ്. രമ്യ കൃഷ്ണൻ, റോണിത്‌ റോയ്, മകരൻദ് ദേശ്പാണ്ഡെ എന്നിവരും ഈ ചിത്രത്തിന്റെ താരനിരയിലുണ്ട്.

തെലുങ്കു സൂപ്പർ താരം മഹേഷ് ബാബു നായകനാവുന്ന ഇരുപത്തിയെട്ടാമത്തെ ചിത്രം ആരായിരിക്കും സംവിധാനം ചെയ്യുക എന്നറിയാനുള്ള ആകാംഷയിലായിരുന്നു മഹേഷ് ബാബു ആരാധകരും സിനിമാ പ്രേമികളും. ഒട്ടേറെ വമ്പൻ സംവിധായകരുടെ പേരുകൾ ചർച്ചയിൽ നിറഞ്ഞു നിന്നെങ്കിലും അവസാനം നറുക്കു വീണത് തെലുങ്കിലെ സൂപ്പർ സീനിയർ സംവിധായകരിൽ ഒരാളായ ത്രിവിക്രം ശ്രീനിവാസിനാണ്. പതിനൊന്നു വർഷങ്ങൾക്കു ശേഷം ത്രിവിക്രം ശ്രീനിവാസ്- മഹേഷ് ബാബു ടീം ഒന്നിക്കുന്ന ഈ ചിത്രം ഹാരിക ആൻഡ് ഹാസിൻ ക്രിയേഷൻസ് എന്ന ബാനറിൽ നിർമ്മിക്കുന്നത് പ്രശസ്ത നിർമ്മാതാവായ എസ് രാധാ കൃഷ്ണ ആണ്. അടുത്ത വർഷം ഏപ്രിൽ അല്ലെങ്കിൽ മെയ് മാസത്തിൽ റിലീസ് ചെയ്യാൻ പാകത്തിന് ഈ ചിത്രത്തിന്റെ ചിത്രീകരണം പൂർത്തിയാക്കാനാണ് അണിയറ പ്രവർത്തകർ പ്ലാൻ ചെയ്യുന്നത്. അത്താടു, ഖാലെജാ എന്നീ സൂപ്പർ ഹിറ്റുകൾ ആണ് ഈ കൂട്ടുകെട്ടിൽ നിന്ന് ഇതിനു മുൻപ് നമുക്ക് മുന്നിലെത്തിയ ചിത്രങ്ങൾ.

എല്ലാത്തരം പ്രേക്ഷകരേയും ഒരുപോലെ തൃപ്തിപ്പെടുത്തുന്ന ഒരു ഗംഭീര മാസ്സ് എന്റർടൈനറാണ് ത്രിവിക്രം ശ്രീനിവാസ് മഹേഷ് ബാബുവിന് വേണ്ടി തയ്യാറാക്കിയിരിക്കുന്നത് എന്നാണ് റിപ്പോർട്ടുകൾ പറയുന്നത്. ഇതിലെ മറ്റു താരങ്ങളുടെ വിവരങ്ങൾ അധികം വൈകാതെ തന്നെ പുറത്തു വിടുമെന്നാണ് സൂചന. മഹേഷ് ബാബുവിനും ത്രിവിക്രം ശ്രീനിവാസിനും 2020 ഒരു മികച്ച വർഷമായിരുന്നു. ത്രിവിക്രം ശ്രീനിവാസ് ഒരുക്കിയ അല്ലു അർജുൻ ചിത്രം അല്ല വൈകുണ്ഠപുറംലോ ബ്ലോക്ക്ബസ്റ്റർ ആയി മാറിയപ്പോൾ മഹേഷ് ബാബു നായകനായി എത്തിയ സാരിലേരു നീക്കെവാര് എന്ന ചിത്രവും സൂപ്പർ വിജയം നേടി. പരശുറാം ഒരുക്കുന്ന സർക്കാരു വാരി പാട്ട എന്ന ചിത്രമാണ് മഹേഷ് ബാബുവിന്റെ അടുത്ത റിലീസ്.

മലയാളത്തിന്റെ യുവ താരം ടോവിനോ തോമസ് നായകനായി എത്തുന്ന പുതിയ ചിത്രമാണ് വരവ്. ഇന്നലെ ഈ ചിത്രം ഒഫീഷ്യൽ ആയി പ്രഖ്യാപിച്ചു കൊണ്ട് ഇതിന്റെ ഫസ്റ്റ് ലുക്ക് പോസ്റ്റർ റിലീസ് ചെയ്തത് മലയാളത്തിന്റെ മഹാനടനായ കംപ്ലീറ്റ് ആക്ടർ മോഹൻലാൽ ആണ്.

മോഹൻലാൽ പുറത്തു വിട്ട ഈ പോസ്റ്ററിന് വലിയ സ്വീകരണമാണ് സോഷ്യൽ മീഡിയയിൽ നിന്നും ലഭിച്ചു കൊണ്ടിരിക്കുന്നത്. വിനീത് ശ്രീനിവാസൻ ഒരുക്കിയ തിര, ബേസിൽ ജോസഫ് ഒരുക്കിയ ഗോദ എന്നി ചിത്രങ്ങളുടെ രചനയ്ക്ക് ശേഷം രാകേഷ് മണ്ടോടി ആദ്യമായി സംവിധാനം ചെയ്യുന്ന ചിത്രമാണ് ‘വരവ്’. വിനീത് ശ്രീനിവാസൻ നായകനായ അരവിന്ദന്റെ അതിഥികൾ എന്ന സൂപ്പർ ഹിറ്റ്‌ ചിത്രത്തിന് ശേഷം പതിയറ ഫിലിംസിന്റെ ബാനറിൽ പ്രദീപ് കുമാർ പതിയറ നിർമ്മിക്കുന്ന ചിത്രത്തിന്റെ രചന നിർവഹിക്കുന്നത് രാകേഷ് മണ്ടോടിയും മനു മൻജിത്തും സുരേഷ് മലയാകണ്ടിയും ചേർന്നാണ്. ഈ ചിത്രത്തിലെ മറ്റു അഭിനേതാക്കൾ ആരൊക്കെ ആയിരിക്കുമെന്നുള്ള വിവരങ്ങൾ അധികം വൈകാതെ പുറത്തു വിടുമെന്നാണ് സൂചന.വരവ് തീയേറ്ററുകളിൽ എത്തുന്നതിനു മുൻപ് ബേസില്‍ ജോസഫ് സംവിധാനം ചെയ്ത മിന്നല്‍ മുരളി, മനു അശോകന്റെ കാണെക്കാണെ, ആഷിക് അബു സംവിധാനം ചെയ്ത നാരദന്‍, സനല്‍കുമാര്‍ ശശിധരന്‍ ചിത്രം വഴക്ക് എന്നീ ടോവിനോ തോമസ് ചിത്രങ്ങൾ പുറത്തു വരും. കാല്‍ത്തളയിട്ട് ഒരു കവുങ്ങില്‍ ചാടി മറിഞ്ഞ് നീങ്ങുന്ന ടൊവിനോയുടെ കഥാപാത്രത്തെ ആണ് ഇന്നലെ പുറത്തു വന്ന വരവ് ഫസ്റ്റ് ലുക്ക് പോസ്റ്ററിൽ കാണുന്നത്. എത്തരത്തിലുള്ള ഒരു ചിത്രമായിരിക്കും ഇതെന്നുള്ള വിവരങ്ങൾ ലഭ്യമല്ല. വിനീത് ശ്രീനിവാസൻ ചിത്രം ഹൃദയത്തിലൂടെ അരങ്ങേറ്റം കുറിച്ച വിശ്വജിത് ഒടുക്കത്തിൽ കാമറ ചലിപ്പിക്കുന്ന ഈ ചിത്രത്തിന് സംഗീതം ഒരുക്കുന്നത് തെലുഗ്, തമിഴ് ചിത്രങ്ങളിലൂടെ ശ്രദ്ധ നേടിയ ഗുണ ബാലസുബ്രമണ്യനാണ്. ദേശീയ അവാർഡ് ജേതാവായ പി എം സതീഷ് സൗണ്ട് ഡിസൈൻ ചെയ്യുന്ന ഈ ചിത്രത്തിന്റെ ഷൂട്ടിംഗ് ഈ വർഷം അവസാനത്തോടെ ആരംഭിക്കുമെന്നാണ് റിപ്പോർട്ടുകൾ പറയുന്നത്.